कञ्चनपुर । स्थानीय तह वित्तीय सुशासन जोखिम मूल्यांकनमा सुदूरपश्चिम प्रदेशमै शुक्लाफाँटा नगरपालिकाले उत्कृष्ट नतिजा ल्याएको छ ।
आव २०८०/८१ को स्थानीय तह वित्तीय सुशासन जोखिम मूल्यांकनमा नगरपालिकाले ९५ अंक ल्याएर सुदूरपश्चिम प्रदेशमा दोस्रो र कञ्चनपुर जिल्लामा प्रथम भएको छ ।
संघीय मामिला तथा सामान्य प्रशासन मन्त्रालयले स्थानीय तहको वित्तीय प्रणाली व्यवस्थित, पारदर्शी, विधिसम्मत् र प्रभावकारी बनाउनका लागि बर्सेनि स्थानीय तहको मूल्यांकन गर्दै आएको छ ।
योजना, बजेट तथा कार्यक्रम व्यवस्थापन, कार्यान्वयन क्षमता व्यवस्थापन, लेखांकन तथा प्रतिवेदन, अनुगमन मूल्यांकन तथा लेखापरीक्षण र राजस्व व्यवस्थापनमा गरी पाँचवटा बुँदामा मन्त्रालयले मूल्यांकन गर्दै आएको छ ।
सोही पद्धतिका आधारमा स्थानीय तहलाई मन्त्रालयले बजेट पठाउने गर्छ । वित्तीय व्यवस्थापनका सम्भावित जोखिमका क्षेत्रको पहिचान गरी यसको लेखाजोखाको माध्यमबाट स्थानीय तहको वित्तीय सुशासनलाई संस्थागत गर्न जोखिम मूल्यांकन गरिँदै आएको नगरपालिकाका प्रमुख प्रशासकीय अधिकृत खेमराज विष्टले बताए ।
उनका अनुसार नगरपालिकाले योजना, बजेट तथा कार्यक्रम व्यवस्थापनमा १९.५, कार्यान्वयन क्षमता तथा व्यव्थापनमा २७.५, लेखांकन तथा प्रतिवेदनमा १७, मूल्यांकन तथा लेखापरीक्षणमा १५ र राजस्व व्यवस्थापनमा १६ अंक प्राप्त गरेको छ ।
जनप्रतिनिधि र कर्मचारीको प्रयास अनुसार नगरपालिकाले मूल्यांकन प्रक्रियामा उत्कृष्ट नतिजा हासिल गर्न सफल भएको नगर प्रमुख रणबहादुर महराले बताए ।
स्थानीय तह वित्तीय सशासन जोखिम मूल्यांकनको प्रकाशित नतिजा अनुसार भीमदत्त नगरपालिकाले ७८.५, बेदकोट नगरपालिकाले ९३, कृष्णपुर नगरपालिकाले ७७, बेलौरी नगरपालिकाले ८२.५, पुनर्वास नगरपालिकाले ६६.५, बेलडाँडी गाउँपालिकाले ९०.५ र लालझाडी गाउँपालिकाले ८८.५ अंक प्राप्त गरेको छ ।
दोधारा चाँदनी नगरपालिका भने स्थानीय तह वित्तीय सुशासन जोखिम मूल्यांकनमा नतिजाविहीन अवस्थामा रहेको छ । रासस
